२८ असार, डोटी । डोटी जिल्ला पूर्ण खोप सुनिश्चितता तथा दिगोपना जिल्ला घोषणा भएको छ ।
“स्थानीय स्वामित्व र सहभागिता, पूर्ण खोप सुनिश्चितता–हाम्रो प्रतिवद्धता” भन्ने मूल नाराका साथ आईतवार एक कार्यक्रमका बीच जिल्लालाई पूर्ण खोप सुनिश्चित तथा दिगोपना घोषणा गरिएको हो स्वास्थ्य कार्यालय डोटीले जानकारी दिएको छ । जिल्लाका नौवटै पालिका पूर्ण खोप सुनिश्चितता तथा दिगोपना घोषणा भईसकेपछि जिल्लास्तरीय घोषणा गरिएको स्वास्थ्य कार्यालय डोटीका प्रमुख डिल्लीरमण जोशीले जानकारी दिए । उनले यस आर्थिक बर्षमा जिल्लाका १६ देखि ५९ महिना उमेर समुहका नौ हजार एक सय ६३ बालबालिकामध्ये नौ हजार ९५ बालबालिकालाई पूर्ण खोप लगाइएको वताए ।
६७ जना बालबालिका भने पूर्ण खोपबाट ड्रप आउट (सुविधाबाट छुट) हुन पुगेको उनले बताए । जसमा सायल गाउँपालिकाका २२, आदर्श गाउँपालिकाका ११, दिपायल सिलगढी नगरपालिकाका ८, जोरायल गाउँपालिकाका ७ र बोगटान फुड्सिल गाउँपालिकाका ६ जना बालबालिका ड्रप आउट रहेका छन् । त्यस्तै के.आई.सिंह गाउँपालिकाका ५, शिखर नगरपालिका र पूर्वीचौकी गाउँपालिकाका ३/३ तथा बडिकेदार गाउँपालिकाका २ जना बालबालिका ड्रप आउट रहेका छन् ।
