मोहन ठकुल्ला, डोटी
सुदूरपश्चिम प्रदेशको पहिलो जिल्लाका रूपमा डोटी पूर्ण खोप सुनिश्चितता तथा दिगोपना घोषणा भएको छ । स्थानीय स्वामित्व र सहभागीता, पुर्णखोप सुनिश्चितता हाम्रो प्रतिबद्धता भन्ने आशयका साथ सोमबार दिपायल सिलगढी नगरपालिकाको सभा हलमा जिल्लालाई पूर्ण खोप सुनिश्चितता घोषणा गरिएको हो ।
प्रत्येक वर्ष पूर्ण खोप सुनिश्चितता घोषणा गर्नु पर्ने नियमित कार्यक्रम अनुसार जिल्लाका सबै पालिका घोषणा भएसँगै यो वर्ष पनि जिल्ला घोषणा गरिएको जिल्ला स्वास्थ्य कार्यालय डोटीका प्रमुख रमेश मलासीले बताए । जिल्लाका दुई सय ३६ वटा खोप केन्द्रबाट प्रत्येक महिनाको ८ देखि १२ गतेसम्म र जिल्ला अस्पताल डोटीबाट महिनाको १५ गते नियमित खोप सेवा प्रवाह हुँदै आएको प्रमुख मलासीले बताए । यी खोप केन्द्रबाट १३ प्रकारका खोप लगाइन्छ ।
२०७९ माघ महिनाबाट सुरु भएको घरधुरी सर्वेक्षण अनुसार ० देखी १५ महिनासम्मका ४ हजार ४ सय ५ बालबालिका मध्ये ६ जना शून्य डोज र ३१ जना ड्रप आउट तथा १६ महिना देखी ५९ महिना सम्मका ११ हजार ६ सय ६ जना बालबालिका मध्ये १६ जना शून्य डोज, एक सय ६६ जना ड्रप आउट र एक सय जना अन्यत्र गएका छन् ।
स्वास्थ्य निर्देशनालय राजपुरका स्वास्थ्य निर्देशक डाक्टर जगदीश जोशीले स्वास्थ्य मानिसको महत्त्वपूर्ण कुरा भएकाले स्वास्थ्य क्षेत्रको विकासको लागि सबैले भूमिका खेल्नुपर्ने बताए । खोप व्यक्तिको भविष्यसँग सरोकार राख्ने हुँदा कतै बालबालिका छुटेका हुनसक्ने भएकाले खोजी गर्नु पर्ने बताए ।
कार्यक्रमका प्रमुख अतिथि तथा दिपायल सिलगढी नगरपालिका नगर प्रमुख बाजि सीँ खड्काले अबका दिनहरूमा पनि दुर्गम क्षेत्रका बालबालिकाहरूको खोजी गरेर आवश्यक खोप लगाउनु पर्ने बताए । अभिभावकहरूले स्वास्थ्यकर्मीलाई सहयोग गरी खोप कार्यक्रमलाई प्रभावकारी बनाउन सहयोग गर्नुपर्ने उनले बताए । जिल्ला पूर्ण खोप सुनिश्चितता घोषण गर्न सहयोग गर्ने महिला स्वयंसेविका, स्वास्थ्यकर्मीसहितलाई कार्यक्रमका अध्यक्ष तथा जिल्ला समन्वय उपप्रमुख स्मृति चुनाराले धन्यवाद दिइन् । उनले जस्तोसुकै महामारीको बेला पनि पहिलो घेरामा रहेर काम गर्ने स्वास्थ्यकर्मी महान् रहेको बताइन् ।
आउने वर्षहरूमा जिल्लालाई पूर्ण खोप सुनिश्चितता तथा दिगोपना कायम गर्न र खोप कार्यक्रममा लगानी सुनिश्चित गर्न कार्यक्रमका सहभागीले हस्तान्तर गरेर प्रतिबद्धता जनाएका छन् । त्यस्तै नौ वटै पालिका, पालिकाका स्वास्थ्य शाखा, स्वास्थ्यकर्मी र स्वास्थ्य स्वयंसेविका सहितलाई प्रशंसा पत्र वितरण गरिएको छ ।
