साउन १३, डोटी
सम विकास केन्द्र (इडिसी) नेपाल डोटीले बझाङमा पुटके ओखेडाको निर्माणाधीन घर भत्काउनेहरूलाई कारबाहीको माग गरेको छ । शनिवार इडिसीका अध्यक्ष अधिराज बिसीले एक विज्ञप्ति जारी गर्दै वित्थडचिर गाउँपालिका–७ मा दलितहरूले बाहुनको नजिक घर बनाउन नहुने भन्दै ओखडाको निर्माणाधीन घर भत्काइएकोमा संस्थाको गम्भीर ध्यानाकर्षण भएको बताएका छन् ।
केही बाहुन थरका गाउँलेहरूले बिहीबार दिउँसो ओखेडाको निर्माणाधीन घर भत्काइदिएका थिए । “कहाली लाग्दो जातीय छुवाछुत तथा भेदभावको बर्बरतापूर्ण घटना प्रति घोर भर्त्सना गर्दै, सिङ्गो राष्ट्रलाई नै लज्जित बनाउने, अमानवीय र जातजाति बिच जातीय द्वन्द्व भड्काउन खोज्ने उक्त घटनामा संलग्न सबै दोषीहरूलाई तत्काल पक्राउ गरी कानुन बमोजिम सजायको जोडदार माग गर्दछौँ” बिसीद्वारा हस्ताक्षरित विज्ञप्तिमा भनिएको छ ।
साथै ओखेडाको भनाई सहित भत्काइएको घर र नष्ट पारिएको बालीनालीको अनुसन्धान गर्ने नाममा बेथिति नगरी तत्काल अपराधीहरूलाई कानुनको दायरामा ल्याउन नेपाल सरकार, सम्बन्धित जिल्ला प्रशासन कार्यालय, जिल्ला प्रहरी कार्यालय बझाङ र वित्थडचिर गाउँपालिकाका अध्यक्षसँग माग गरिएको छ ।
