असोज १९, डोटी
डोटीको बोगटान फुड्सिल गाउँपालिकाले एम्बुलेन्स सञ्चालनमा ल्याएको छ । शुक्रवार गाउँपालिकाका अध्यक्ष कमल बहादुर गड्सिलाले पूजा गरेसँगै एम्बुलेन्स सञ्चालनमा आएको छ । नेपाल सरकारबाट राजश्व छुट प्राप्त एम्बुलेन्स चवाराचौतारा स्वास्थ्य चौकीलाई केन्द्र बनाएर सञ्चालन हुने छ ।
एम्बुलेन्स नहुँदा बिरामी भएका बेला पालिकामा नागरिकले भोग्दै आएको सास्तीलाई मध्यनजर गरेर एम्बुलेन्स सञ्चालनमा ल्याएको गाउँपालिका अध्यक्ष कमल बहादुर गड्सिलाले बताए । ‘आजबाट एम्बुलेन्स सञ्चालनमा आएको छ, अध्यक्ष गड्सिलाले भने, एम्बुलेन्स सेवाबाट बिरामीको भनेका बेला गाडी नपाउने र चर्को रुपैयाँ तिर्नुपर्ने समस्या केही हदसम्म समाधान हुने छ ।’
पालिकाले एम्बुलेन्स ल्याएसँगै स्थानीयले सामाजिक सञ्जाल फेसबुकमा खुसी व्यक्त गरिरहेका छन् । एम्बुलेन्सका लागि चालक देव बहादुर गड्सिलालाइ ९८६५८९७४२४ मा सम्पर्क गर्न सकिने छ ।
