मङ्सिर २२, डोटी । सामुदायिक विकास मञ्च सिडिएफ नेपाल डोटीले कृषक समूहलाई डिजिटल तराजु हस्तान्तरण गरेको छ । डोटी जिल्लाको दिपायल सिलगढी नगरपालिका-७ र शिखर नगरपालिका वडा नम्बर ३ र ६ का ८ वटा कृषक समूहलाई डिजिटल तराजु हस्तान्तरण गरिएको हो । प्राकृतिक तरकारी खेतीमा आबद्ध किसानहरूलाई मध्यनजर गरी तराजु वितरण गरिएको संस्थाले बताएको छ ।
गुड नेवर्स इन्टरनेसनल नेपालको आर्थिक तथा प्राविधिक सहयोग र सामुदायिक विकास मञ्च (सिडिएफ) नेपाल डोटीको साझेदारी मार्फत कार्यान्वयन भइरहेको एकीकृत सामुदायिक विकास परियोजना अन्तर्गत सिडिएफ नेपाल डोटीले आफ्नो कार्यक्षेत्र भित्र पर्ने शिखर नगरपालिका वडा नम्बर ३, ६ र दिपायल सिलगढी नगरपालिका-७ उडितोलामा प्राकृतिक तरकारी खेती गर्दै आइरहेका ८ वटा कृषक समूहलाई प्रति समूह एक वटाका दरले ८ वटा एक सय किलो तौल क्षमताका डिजिटल तराजु कृषक समूहलाई प्रदान गरिएको हो ।
कृषक समूहलाई तराजु हस्तान्तरण गर्दै शिखर नगरपालिका वडा नम्बर ६ का वडा अध्यक्ष धिर्क बहादुर सिंहले डिजिटल तराजुले किसानले आफूले उत्पादन गरेको तरकारी तथा अन्य बालीहरू आफ्नै खेतबारीमा बिक्री गर्न सजिलो हुने र आफूले के कति उत्पादन र बिक्री गरे भन्ने कुराको तथ्याङ्क राख्न सजिलो हुने बताएका छन् । उनले सहयोगी संस्था प्रति कृतज्ञता व्यक्त गरे ।
कृषक समूहमा आबद्ध कृषकहरूले तराजु पाउँदा आफूहरूलाई आफ्नो उत्पादन घर दैलोमा बिक्री वितरण गर्न निकै राहत पुग्ने र आगामी दिनमा पनि यस्तै सहयोग मिलेमा आफूहरूले आफ्नो व्यवसायलाई निरन्तरता दिइरहने कुरा व्यक्त गरे ।
