बितेको २४ घन्टामा थप ४ सय ८१ जनामा नोबेल कोरोना भाइरसको सङ्क्रमण पुष्टि भएको छ । स्वास्थ्य तथा जनसंख्या मन्त्रालयका अनुसार योसँँगै नेपालमा कोरोना सङ्क्रमण हुनेको जम्मा संख्या दुई लाख ५८ हजार एक सय ८१ पुगेको छ । पछिल्लो २४ घन्टामा सात सय ३१ जना कोरोनामुक्त भएको मन्त्रालयले जनाएको छ ।
हालसम्म कोरोना सङ्क्रमणमुक्त हुनेको संख्या दुई लाख ४९ हजार आठ सय ६३ पुगेको मन्त्रालयका प्रवक्ता डा जागेश्वर गौतमले जानकारी दिनुभयो । अहिले देशभर सक्रिय सङ्क्रमितको संख्या ६ हजार चार सय ९३ रहेको छ । कोरोनाबाट २४ घन्टामा थप ६ जनाको निधन भएको पनि मन्त्रालयले जानकारी दिएको छ । हालसम्म कोरोना सङ्क्रमणबाट निधन हुनेको संख्या १८ सय २५ पुगेको छ ।
सरकारले निजी प्रयोगशालाहरूमा कोरोना भाइरसको पीसीआर परीक्षण गर्ने कार्य तत्कालका लागि स्थगित गरेको छ । मन्त्रालयका प्रवक्ता डा. जागेश्वर गौतमले निजी प्रयोगशालामा पीसीआर जाँच स्थगित गरिएको बताउनुभयो ।
