डोटी : शनिवार डोटीका थप ३६ जनामा कोरोना संक्रमण पुष्टि भएको छ । पछिल्लो २४ घण्टामा एक सय ८ जनाको पिसिआर परिक्षण गर्दा ३६ जनामा कोरोना पुष्टि भएको स्वास्थ्य कार्यालय डोटीले जनाएको छ । कोरोना देखिएका २९ जना पुरुष र ७ महिला हुन् ।
आज कोरोना देखिएका बडिकेदार गाउँपालिकाका १९ जना, दिपायल सिलगढी नगरपालिकाका ११ जना, आदर्श गाउँपालिका र बोगटान फुड्सिल गाउँपालिकाका दुईदुई जना, शिखर नगरपालिका र पुर्विचौकी गाउँपालिकाका एकएक जना हुन् । यो संगै जिल्लामा हालसम्म कोरोना संक्रमितको संख्या दुई हजार चार सय ८१ पुगेको स्वास्थ्य कार्यालय डोटीका निमित्त कार्यालय प्रमुख उद्धव वहादुर ठगुन्नाले जानकारी दिनु भयो ।
नयाँ भेरियन्ट सहितको कोरोना संक्रमण फैलिए देखि डोटीका एक हजार ६० जनामा कोरोना पुष्टि भएको र अहिले ४ सय १५ जना सक्रिय संक्रमित रहेको स्वास्थ्य कार्यालय डोटीले जानकारी दिएको छ ।
