डोटी : सोमवार डोटीका थप ४९ जनामा कोरोना संक्रमण पुष्टि भएको छ । पछिल्लो २४ घण्टामा ३८ जनाको पिसिआर परिक्षण गर्दा २९ जनामा र ५७ जनाको एन्टिजेन विधिबाट परिक्षण गर्दा २० जनामा कोरोना पुष्टि भएको स्वास्थ्य कार्यालय डोटीले जनाएको छ । कोरोना देखिएका २९ जना पुरुष र २० महिला हुन् ।
आज कोरोना देखिनेमा दिपायल सिलगढी नगरपालिकाका १२ महिला र ११ पुरुष सहित २३ जना, आदर्श गाउँपालिकाका ७ महिला र ५ पुरुष सहित १२ जना, बडिकेदार गाउँपालिकाका ६ जना पुरुष, पुर्विचौकी गाउँपालिकाका ३ जना पुरुष, शिखर नगरपालिका र केआई सिंह गाउँपालिकाका दुईदुई जना पुरुष र जोरायल गाउँपालिकाका एक जना महिला रहेका छन् ।
यो संगै जिल्लामा हालसम्म कोरोना संक्रमितको संख्या दुई हजार पाँच सय ३१ पुगेको स्वास्थ्य कार्यालय डोटीका निमित्त कार्यालय प्रमुख उद्धव वहादुर ठगुन्नाले जानकारी दिनु भयो । नयाँ भेरियन्ट सहितको कोरोना संक्रमण फैलिए देखि डोटीका एक हजार एक सय १० जनामा कोरोना पुष्टि भएको र अहिले ३ सय ३० जना सक्रिय संक्रमित रहेको स्वास्थ्य कार्यालय डोटीले जानकारी दिएको छ ।
