डबल बम, डोटी
सुदूरपश्चिम प्रदेशको प्रमुख पर्यटकीय तथा धार्मिक स्थल खप्तडमा सुन्दर सुदूर पश्चिम शैलेश्वरी खप्तड म्याराथन प्रतियोगिता हुने भएको छ । डोटी उद्योग वाणिज्य सङ्घ डोटी, श्री ५ बाहिनी अड्डा राजपुर, डोटी श्री भैरव प्रसाद गण सिलगढी डोटीले आयोजन गर्ने उक्त प्रतियोगिता जेठ २५ गते बुधवार देखी सुरु हुने भएको छ ।
आइतबार दिपायल स्थित होटेल घटालमा पत्रकार सम्मेलन गरी प्रतियोगिताको बारेमा जानकारी गराइएको थियो ।
म्याराथन प्रतियोगितामा भलिबल, देउडा, रन फर फन जस्ता खेल सञ्चालन हुने छन् । म्याराथन दौड खप्तड देखि शैलेश्वरि मन्दिर सिलगढीसम्म ३२ किलोमिटर लामो हुने छ । उक्त दौडमा सुदूरपश्चिम प्रदेशका प्रत्येक जिल्लाबाट दुई÷दुई जना र दुई जना अन्य गरी २० जना सहभागी हुनेछन् । नेपाली सेनाको सुर्खेत, दिपायल लगायत अन्य अड्डा बाट २५ जना गरी जम्मा ५५ जना सहभागी हुनेछन् । २५ गते बुधवार भलिबल बाट सुरु गरिने भएको छ । २६ गते देउडा प्रतियोगिता र २७ गते खप्तड बाट रन फर फन १४ किलोमिटरको हुनेछ ।
प्रतियोगितामा प्रथम म्याराथन विजेतालाई १ लाख, द्वितीयलाई ७५ हजार, तृतीयलाई ५० हजार र ५ जनालाई १०/१० हजार पुरस्कार दिइने छ । प्रथम भलिबल टिमलाई रु ५० हजार, द्वितीयलाई रु २५ हजार र तृतीयलाई रु १५ हजार तथा प्रथम देउडा प्रतियोगीलाई रु २५ हजार, द्वितीयलाई रु १५ हजार र तृतीयलाई रु १० हजार पुरस्कार प्रदान गरिने छ ।
प्रतियोगितामा भाग लिन चाहने प्रतियोगीले २४ गते साँझसम्म भलिबल र २५ गतेसम्म म्याराथनमा टिम तथा नाम दर्ता गराउन सकिने छ ।
नागरिक सैनिक सुदृढका साथै आन्तरिक तथा बाह्य पर्यटक भित्र्याउन, सुदूर पश्चिमको पर्यटन वृद्धि गर्न उक्त कार्यक्रमको आयोजना गर्न लागेको प्रमुख सेनानी जनमत कार्कीले बताए । कार्यक्रमको कुल लागत १५ लाख रहेको छ ।
