डोटी : डोटीको बोगटान फुड्सिल गाउँपालिका वडा नम्बर ६ गगुडाका ४ सय ६० विद्यार्थीलाई शैक्षिक सामग्री वितरण गरिएको छ । शुक्रवार कक्षा १, २ र ३ मा अध्ययनरत वडा भरीका ४ सय ६० विद्यार्थीलाई वडा कार्यालयले शैक्षिक सामग्री वितरण गरेको हो । प्रत्येक विद्यार्थीलाई २५ कपि, एक प्याकेट पेन्सिल, कटर तथा वर्णमाला लगाएर तीन लाख रुपैयाँ मूल्य बराबरको शैक्षिक सामग्री वितरण गरिएको वडा अध्यक्ष श्याम बोगटीले जानकारी दिनुभयो ।
स्थानीय तहको चुनावमा होमिएका बेला आफूले शिक्षालाई पहिलो प्राथमिकता दिएको हुनाले शैक्षिक गतिविधिलाई प्राथमिकता दिँदै आएको उहाँले बताउनुभयो । यो भन्दा पहिला आमा बुवा नभएका वडाका १५ विद्यार्थीलाई व्यक्तिगत लगानीमा झोला, विद्यालय पोषक लगायतका शैक्षिक सामग्री वितरण गरेको पनि वडा अध्यक्ष बोगटीले बताउनुभयो ।
अध्यक्ष बोगटीले आगामी दिनमा विद्यार्थीको लागि वडाबाट कोचिङ क्लासको व्यवस्था गर्ने र विद्यालयका प्रधानाध्यापक, विद्यालय व्यवस्थापन समितिका अध्यक्ष र केही विद्यार्थीलाई जिल्ला बाहिरका नाम चलेका विद्यालयमा शैक्षिक भ्रमणमा लैजाने योजना रहेको सुनाउनुभयो । विद्यार्थीलाई वडाले शैक्षिक सामग्री वितरण गरेपछि अभिभावकले खुसी व्यक्त गरेका छन् ।
