सुबास नेपाली
कात्तिक २३, डोटी
शिखर नगरपालिकाका ३५ जना महिलाहरूलाई बाख्रा वितरण गरिएको छ । सम विकास केन्द्र नेपाल अन्तरगत डिसिएद्वारा सञ्चालित गिफ्ट परियोजनाको सहयोग तथा शिखर नगरपालिका–१० को सहकार्यमा प्रगतिशील महिला समूहका ३५ जना महिलाहरूलाई बाख्रा वितरण गरिएको हो । जनही ४ बाख्रा पर्नेगरि करिब २० लाख बराबरका १ सय ४० बाख्रा वितरण गरिएको गिफ्ट परियोजनाका कार्यक्रम संयोजक टेक बहादुर नेपालीले जानकारी दिए । उनका अनुसार २ वटा बीउ बोका समेत वितरण गरिएको छ ।
समूहका महिलाहरूलाई बाख्रा हस्तान्तरण गर्दै सम विकास केन्द्र नेपालका उपाध्यक्ष रश्मि गहतराजले समुदायमा रहेका दलित, एकल महिला विपन्न परिवारको जीविकोपार्जनमा सहज होस् भन्ने उद्देश्यले बाख्रा वितरण गरिएको बताइन् । वडा कार्यालय, समूह र संस्थाका प्रतिनिधि सहभागी खरिद समितिले विभिन्न बाख्रा फर्मको स्थलगत अनुगमन गरी बाख्रा खरिद गरेर वितरण गरेको सम विकास केन्द्र नेपालका संस्थापक सदस्य तथा गिफ्ट परियोजनाका फोकल पर्सन केशव परियारले बताए । वितरण गरिएका बाख्रा निरोगी रहेको उनको भनाइ छ ।
बाख्रा प्राप्त गरे पछि समूहका महिलाहरू खुसी भएका छन् । उनीहरूले आफ्नो वडालाई बाख्रा पकेट क्षेत्रको रूपमा बिस्तार गर्ने बताएका छन् । सम विकास केन्द्र नेपालले जिल्लामा सशक्तीकरण, आय आर्जन, जातीय विभेद, लैङ्गिक विभेद, हलिया मुक्ति लगायतका क्षेत्रमा काम गर्दै आइरहेको छ ।
