भदौ २३, डोटी । डोटीमा हत्या आरोपमा एक जना युवक पक्राउ परेका छन् । प्रहरीले ७५ वर्षीय वृद्धको हत्या आरोपमा दिपायल सिलगढी नगरपालिका–६ सिलगढी बस्ने २२ वर्षीय सरोबर श्रेष्ठलाई आइतबार पक्राउ गरेको हो ।
जिल्ला प्रहरी कार्यालय डोटीका अनुसार दिपायल सिलगढी नगरपालिका–७ रातुली स्थायी घर भई सोही नगरपालिका–६ सिलगढीमा बस्दै आएका ७५ वर्षीय कालु सिंह बिस्टको हत्या आरोपमा श्रेष्ठ पक्राउ परेका हुन् । श्रेष्ठलाई सुदूर पश्चिम प्रदेश प्रहरी कार्यालय धनगढीको समन्वय र जिल्ला प्रहरी कार्यालय कैलालीको सहयोगमा पक्राउ गरिएको जिल्ला प्रहरी कार्यालय डोटीका डिएसपी भिमलाल भट्टराईले जानकारी दिनुभयो । घटनामा संलग्न श्रेष्ठलाई पक्राउ गरी प्रहरीले थप अनुसन्धान गरिरहेको डिएसपी भट्टराईले बताउनु भयो ।
भदौ १७ गते देखि सम्पर्क विहीन भएका वृद्ध कालु सिंह बिस्ट भदौ २० गते आफ्नै कोठाभित्र बाहिरबाट ताला लगाइएको अवस्थामा मृत फेला परेका थिए । विष्ट सम्पर्कविहीन भएको प्रहरी कार्यालयमा निवेदन परेपछि २० गते बिहान कोठाको ताला फोडेर हेर्दा हत्या गरिएको अवस्थामा प्रहरीले शव फेला पारेको थियो ।
शङ्कास्पद मृत फेला परेका वृद्धको हत्या भएको भन्दै बुझेनन् आफन्तले शव – Muluk News
