डोटी: नेपाली क्रिकेट टिमका कप्तान ज्ञानेन्द्र मल्लसहित तीन खेलाडीलाई कोरोना भाइरस (कोभिड १९) को संक्रमण पुष्टि भएको छ । ज्ञानेन्द्रसँगै उपकप्तान दीपेन्द्र सिंह ऐरी र रोहितकुमार पौडेललाई संक्रमण पुष्टि भएको हो ।
बन्द प्रशिक्षणका लागि बोलाइएका २२ मध्ये १६ खेलाडीको बुधबार स्वाब संकलन गरिएको थियो । शरद भेषावकर, बसन्त रेग्मी, सन्दीप लामिछाने, करण केसी, सुवास खकुरेल र कुशल मल्लले पनि स्वाब दिएका छैनन् ।
रेग्मीलाई यसअघि नै कोरोना संक्रमण देखिएकाले स्वाब दिन नआएको क्रिकेट संघ स्रोतले जनाएको छ । शरद र सुवास पारिवारिक कारणले स्वाब दिन नपुगेका हुन् भने करण उपत्यका बाहिर छन् । कुशल कक्षा १२ को परीक्षाा दिइरहेका छन् भने सन्दीपले एक साता परिवारसँग बसेर प्रशिक्षणका लागि आउने छन् ।
स्टाफ प्रदीप लामालाई पनि कोरोना संक्रमण देखिएको छ । क्यान सचिव अशोकनाथ प्याकुरेलका अनुसार काठमाडौंमै घर भएका खेलाडीहरु होम क्वारेन्टिनमा र बाहिरका खेलाडीहरुलाई होटलमा आइसोलेसनमा बस्नेछन् ।
थप ५ खेलाडी बन्द प्रशिक्षणमा
यसैबीच क्रिकेट संघले थप ५ खेलाडीलाई बन्द प्रशिक्षणमा बोलाएको छ । बिक्रम शोव, अनिलकुमार साह, कुशल भुर्तेल, ऋत गौतम र लोकेश बमलाई प्रशिक्षणमा बोलाइएको हो ।
उनीहरूमध्ये लोकेश उपत्यका बाहिर परीक्षामा रहेकाले तत्काल सहभागी हुने छैनन् । चार खेलाडीले भने पीसीआर टेष्ट गर्दा नेगेटिभ आएमा बिहीबारबाटै प्रशिक्षणमा सहभागी हुनेछन् ।
