रामहरि ओझा
२९ माघ, डोटी
आफ्नो ७६औँ वार्षिकोत्सवको अवसरमा पद्म पब्लिक मुक्ति नारायण माध्यमिक विद्यालयले आयोजना गरेको अन्तर विद्यालय क्रिकेट प्रतियोगिताको अन्तिम प्रतिस्पर्धा सम्पन्न भएको छ ।
प्रतियोगितामा आयोजक पप मुना माविले उपाधी हात पारेको छ । सोमवार भएको फाइनल खेलमा प्रतिस्पर्धी दिपायल एकेडेमीलाई २ विकेटले हराउँदै विजयी प्राप्त गरेको हो । टस जितेर आयोजक पप माविले दिपायल एकेडेमीलाई ब्याटिङको निम्तो दिएको थियो । दिपायल एकेडेमीले पहिले ब्याटिङ गर्दै ८० रन बनाएको थियो । जवाफी ब्याटिङमा पप मुना माविले ८ विकेट गुमाउँदै २ विकेटको रोमाञ्चक जित निकालेको छ ।
नवौँ नम्बरमा ब्याटिङ गर्न आएका पप मुना माविका खेलाडी खगेन्द्र मलासीले बललाई सीमारेखा पठाउँदै रोमाञ्चक जित दिलाएका थिए । लिग कम आधारमा खेलाइएको सेमिफाइनल म्याचमा दुवै टोलीले मोर्निङ लाईट स्कुललाई पराजित गर्दै फाइनल खेलेका थिए । प्रतियोगितामा मोर्निङ्ग लाईट स्कुल तृतीय भएको थियो । फाइनल खेलको उत्कृष्ट खेलाडी दिनेश नेपाली वनेका छन् ।
प्रतियोगितामा १० टिमको सहभागिता रहेको थियो । क्रिकेट प्रतियोगितामा प्रथम, द्वितीय र तृतीय हुने टिमले क्रमशः ३५ हजार, २० हजार र १० हजार रुपैयाँ नगद पुरस्कार पाउनेछन् । पुरस्कार विद्यालयको ७६औँ वार्षिकोत्सवको अवसरमा बुधवार वितरण गरिनेछ ।
वार्षिकोत्सवको अवसरमा आयोजित अन्तर विद्यालय आधारभूत तह (कक्षा ६–८) स्तरीय हाजिरी जवाफ प्रतियोगितामा सहभागी १० वटा टिमहरूमध्ये पप मुना मावि प्रथम, भागरथी एकेडेमी, सिलगढी द्वितीय र पवित्र आवासीय मावि र मोर्निङ्ग लाईट बोर्डिङ स्कुल तृतीय भएका छन् ।
हाजिरी जवाफ प्रतियोगितामा प्रथम, द्वितीय र तृतीय हुने टिमले क्रमशः पाँच हजार, तीन हजार र दुई हजार रुपैयाँ नगद पुरस्कार पाउनेछन् ।
