चैत ५, डोटी
ज्येष्ठ नागरिकसँग वडा अध्यक्ष कार्यक्रम अन्तर्गत बोगटान फुड्सिल गाउँपालिका–७ चवराचौताराका ६८ जना ज्येष्ठ नागरिकको स्वास्थ्य चेकजाँच गरिएको छ । चैत २ गतेदेखि ५ गतेसम्म वडाका विभिन्न टोलमा आयोजना गरिएको स्वास्थ्य शिविरमा ४२ जना महिला र २६ जना पुरुष ज्येष्ठ नागरिकको स्वास्थ्य जाँच तथा उपचार गरिएको हो ।
बोगटान फुड्सिल गाउँपालिका–७ को आर्थिक सहयोग तथा चवराचौतारा स्वास्थ्य चौकीको आयोजनामा सञ्चालन भएको शिविरमा डा. संजित कुमार यादव सहितको स्वास्थ्यकर्मीको टोलीले ज्येष्ठ नागरिकको स्वास्थ्य जाँच तथा उपचार गरेको हो । २ गते ओजेली, ३ गते सुकाटी, ४ गते चनुँकाडा र ५ गते चवराचौतारा स्वास्थ्य चौकीमा सञ्चालन भएको शिविरमा स्वास्थ्य जाँचका गर्नुका साथै बिरामीहरूलाई आवश्यक औषधी निःशुल्क दिइएको छ ।
शिविरमा स्वास्थ्य जाँच गरिएकाहरूमा २२ जनामा ढाड तथा नशा सम्बन्धी समस्या, १२ जनामा ग्यास्ट्रिक, ८ जनामा सुगर, तीन जनामा दम र पाँच जनामा प्रेसर सम्बन्धी समस्या देखा परेको चवराचौतारा स्वास्थ्य चौकी प्रमुख प्रकाश विकले बताए । ज्येष्ठ नागरिकको साथमा जनप्रतिनिधि रहेको विश्वास दिलाउन यस्तो कार्यक्रम ल्याइएको वडा अध्यक्ष चन्द्रमान सुनारले बताए । विभिन्न कारण रोग पालेर बसेका वडाका ज्येष्ठ नागरिकको रोग पहिचान गरी उपचारको दायरामा ल्याउन र स्वास्थ्य चौकीसम्म आउन नसक्नेहरूको टोलमै उपचार गर्ने उद्देश्यले शिविरको आयोजना गरिएको अध्यक्ष सुनारले बताएका छन् । टोलमै स्वास्थ्य सेवा पाएपछि सेवाग्राही खुसी भएका छन् ।
