लाल बहादुर चदारा
असोज २४, मेल्लेख
अछामको मेल्लेख गाउँपालिकामा पालिका स्तरीय परियोजना परिचयात्मक बैठक सम्पन्न भएको छ । वर्ल्ड भिजन इन्टरनेशनल नेपालको साझेदारीमा सञ्चालित वाक नेपाल एकीकृत उत्थानशील जीविकोपार्जन तथा पोषण परियोजना र आस्था नेपालको बाल संरक्षण तथा बाल स्पोनसरसिप परियोजना अन्तर्गत परियोजना मार्फत आगामी वर्ष २०२४ मा गर्ने क्रियाकलाप बारे जानकारी गराएको छ ।
बैठकमा अस्था नेपाल मार्फत बाल संरक्षण बाल स्पोनसरसिप परियोजना अन्तर्गत मेल्लेखको ८ वटै वडामा सुरक्षित सम्मानित, सशक्त र समृद्ध बालबालिका बनाउने उद्देश्यका लागि १ करोड १८ लाख भन्दा बढीको अनुमानित बजेट अस्था नेपाल परियोजना अधिकृत तपेन्द्र ठकुल्लाले सार्वजनिक गरे ।
यस्तै वाक नेपालद्वारा एकीकृत उत्थानशि जीविकोपार्जन तथा पोषण परियोजना अन्तर्गत जोखिम तथा विपन्न परिवारको जीविकोपार्जनमा सहयोग पुर्याउने उद्देश्यले आगामी वर्षका लागी अन्य विभिन्न क्रियाकलाप सञ्चालन गर्न १ करोड ९ लाख भन्दा बढीको अनुमानित बजेट वाक नेपाल परियोजना अधिकृत निरन्जना पनेरुले सार्वजनिक गरेका हुन् ।
बैठकमा वाक र आस्था नेपाल मार्फत २०२३ भए गरेका कामको समीक्षा र २०२४ मा गर्नुपर्ने क्रियाकलापको सरोकारवाला समक्ष सुझाव सङ्कलन तथा छलफल गरिएको थियो । मेल्लेख गाउँपालिका २ का वडा अध्यक्ष कुसलराज बुढाको अध्यक्षतामा भएको बैठकको प्रमुख अतिथि मेल्लेख गाउँपालिका अध्यक्ष ज्वाला सीँ साउद रहेका थिए। साउदले वर्ल्ड भिजन इन्टरनेशनल नेपालको साझेदारीमा आस्था नेपाल र वाक नेपालले मेल्लेख गाउँपालिकाको समन्वयमा थुप्रै क्रियाकलाप सञ्चालन गरी प्रभावकारी कार्यान्वयन भई समुदाय रूपान्तरणमा सहयोग पुगेको भन्दै संस्थालाई धन्यवाद दिए ।
वाक नेपाल सञ्चालक समिति बोर्ड सदस्य सुरत खड्काले मेल्लेख गाउँपालिकाको समन्वयमा संस्थाले गर्ने हरेक क्रियाकलाप यो वर्ष पनि प्रभावकारी रुपामा कार्यान्वयन गरिने बताए । आस्था नेपाल जिल्ला कार्यसमिति बोर्ड सदस्य गंग बहादुर बुढाले संस्था मार्फत भए गरेका काम काजको निरन्तरताका लागि पालिकाको सहयोग र प्रभावकारी अनुगमन गरिनुपर्ने जनाएका छन् ।
सहभागी ८ वटै वडाका वडाअध्यक्षहरु र विषयगत शाखा प्रमुख, सरोकारवालाहरूले संस्थाले गरेको काम समुदाय रूपान्तरणमा निकै सहयोग पुगेको भन्दै प्रशंसा गरेका थिए । वाक नेपाल अनुगमन संयोजक जगत् रावल लगायत संस्थाका सामाजिक परिचालकहरूको उपस्थित रहेको थियो ।
