बेलायतका प्रधानमन्त्री बोरिस जोन्सनले देशमा दोस्रो पटक बन्दीबन्दीको घोषणा गरेका छन्। शनिबार प्रधानमन्त्री जोन्सनले पत्रकार सम्मेलन गरी आगामी बिहीबारदेखि लागू हुने गरी चार हप्ताका लागि बन्दाबन्दीको घोषणा गरेका हुन्।
यो पटकको बन्दाबन्दीमा पहिले जस्तो स्कुल, कलेज तथा विश्वविद्यालयहरू भने बन्द हुने छैनन्। अत्यावश्यक वस्तुबाहेकका अन्य पसलहरू पूर्णरूपमा बन्द रहने बताइएको छ।
हस्पिटालिटी क्षेत्रमा रेस्टुरेन्ट र पबहरू बन्द रहने भए पनि टेक–वे पसलहरू भने खुल्ने बताइएको छ। पछिल्लो पटक कोरोना सङ्क्रमणको सङ्ख्या एक्कासि बढेपछि कुन तहको बन्द गर्ने भन्ने सवालमा सरोकारवालाहरूसँग करिब तीन हप्ता गरेको छलफलबाट बन्द गर्ने निष्कर्षमा सरकार पुगेको हो।
युरोपमा पछिल्लो समय कोरोना संक्रमण बढ्न थालेपछि सरकारले लकडाउनको घोषणा गरेको हो। बेलायत अहिले कोरोना संक्रमण सबैभन्दा बढी भएको मुलुकको नवौं स्थानमा रहेको छ।
