भदौ ३०, काठमाडौं । विश्व क्रिकेटका सुपरस्टार अष्ट्रेलियाका डेभिड वार्नरलाई नेपाल प्रिमियर लिग (एनपीएल) २०२४ खेलाउन नेपाल ल्याउने तयारी भएको छ ।
वार्नरलाई नेपाल ल्याउन एनपीएलको फ्रेन्चाइज टोली लुम्बिनीले कुराकानी अगाडि बढाइसकेको छ । नेपाल क्रिकेट संघ (क्यान) ले विदेशी खेलाडी ल्याउने जिम्मा फ्रेन्चाइज टोलीलाई नै दिएपछि क्लबहरु आफैंले विश्वका स्टार क्रिकेटरहरुसँग छलफल गरिरहेका छन् ।
‘हामीले वार्नरसँग एक पटक कुराकानी गरेका थियौं । उनी नेपाल आउन सकरात्मक थिए’, लुम्बिनीको स्वामित्व किनेको फरच्युना हेल्थ केयर प्रालिका प्रबन्ध सञ्चालक ईश्वर जिसीले भने ।
तर वार्नरले नेपाल आउन भने केही शर्त राखेका छन् । वार्नरले यो लिगमा को को खेल्छन् भनेर प्रश्न गरेको ईश्वर बताउँछन् । उनले विश्वप्रसिद्ध खेलाडी आएमा आफू पनि आउन सक्ने जवाफ दिएको बताएका छन् । यो कुराकानी एजेन्ट मार्फत गरेको जिसी बताउँछन् ।
टिम छनोट अक्सनमा फरच्युना हेल्थ केयरले लुम्बिनीको स्वामित्व १ करोड ८६ लाखमा किनेको थियो । शनिबार भएको ८ मार्की खेलाडीको लक्की ड्र मा नेपालका कप्तान रोहित पौडेललाई पाएको थियो ।
गत जुनमा आईसीसी टी–२० विश्वकपमा भारतसँग पराजित भएसँगै वार्नरले सन्न्यास लिएका थिए । बायाँ हाते ब्याटर वार्नर विश्व क्रिकेट कै एक सफल ओपनरमा पर्दछन् । विशेषगरी उनी आक्रामक ब्याटिङलाई चिनिने गर्छन् ।
