फागुन २४, डोटी । डोटीको दिपायल सिलगढी नगरपालिका-८ मा पहिलो पटक महिनावारी भएकी किशोरीसँग अन्तर्राष्ट्रिय महिला दिवस मनाइएको छ । किशोरी हरिना कडायत पहिलो पटक महिनावारी भई तीन दिन पुगेको अवसरमा स्थानीय तिलको लड्डु खादै महिनावारी उत्सव मनाइएको छ ।
शनिवार ११५ औँ अन्तर्राष्ट्रिय महिला दिवसको अवसरमा सशक्त महिला समृद्ध परियोजना अन्तर्गत पिसविन नेपाल र युनेफपिएको प्राविधिक सहयोग तथा सुना देवी बाल क्लबको आयोजनामा महिनावारी उत्सव मनाइएको परियोजना अधिकृत रमा भण्डारीले बताइन् । जन्मदिन, विवाह उत्सव जस्ता दिनलाई विशेष दिनका रूपमा लिँदै खुसीयाली मनाउन मिल्ने तर कुनै किशोरी आमा बन्न योग्य हुँदा किन खुसीयाली बनाउन नमिल्ने भन्दै यस्तो कार्यक्रम गरिएको भण्डारीको भनाइ छ ।
महिनावारी उत्सवमा किशोरीका बुवा, आमा, दाजु, भाउजू लगायत छिमेकीको सहभागिता रहेको थियो । उत्सवमा सबै जनाले उनलाई तिलको लड्डु खुवाउँदै खुसीयाली साटे । साथै जडो गाडेर बसेको छाउपडी प्रथालाई अन्त्य गर्न घर दैलो अभियान पनि सञ्चालन गरिएको छ ।
महिनावारि भएको समयमा सबै जनाले खुसीयाली मनाएकोमा खुसी लागेको किशोरी कडायतले बताइन् । महिनावारि भएपछि कोही कसैले नछुने तथा अलग्गै राख्ने परिपाटी रहेको समाजमा खुसीयाली बनाउँदै लड्डु खाएपछि उनले महिनावारी प्रतिको नराम्रो दृष्टिकोण हटेको बताइन् । हरिनाको महिनावारीलाई उत्सवको रूपमा मनाएको देखेपछि उनकी साथीले परिवर्तनको महसुस गरेको बताइन् । आफू महिनावारी हुँदा लामो समय घरपरिवारबाट अलग्गै बस्नु परेको तितो विगत सम्झँदै अहिलेका किशोरीहरू भाग्यमानी रहेको उनले बताइन् ।
पुर्खाहरूले सिकाएको र त्यहीँ कुरालाई संस्कारको रूपमा लिँदै आएकोले विगतमा छाउपडी प्रथा मान्न आफूहरू बाध्य भएको बसुदेवि कडायताले बताइन् । सचेतनामुलक कार्यक्रम, पढाइबाट समाजका नागरिक शिक्षित बन्दै गएपछि महिनावारी भएको बेला छाउपडी भनेर मान्नु गलत रहेको कुरा थाहा भएको उनले बताइन् ।
